Күрше төбәктә югалган 15 яшьлек Искәндәрне эзлиләр

Башкортстанда 15 яшьлек Искәндәр Мөхәммәдиев югалган. Бу турыда ДПСО «БаРС» (БашРегионСпас) оешмасына сылтама белән «Башинформ» хәбәр итте.

«Башрегионспас» волонтерлары «ВКонтакте» социаль челтәрендә хәбәр иткәнчә, Белорет районының Инзер авылында яшәүче үсмер 25 гыйнварда өйдән чыгып киткән һәм әйләнеп кайтмаган. Баланың яшәү урыныннан китү очрагы беренче генә булмавы турында да белешмә бар.

Башкортстан буенча Эчке эшләр министрлыгында әлеге хәбәрне раслаганнар, эзләү эшләре барганын әйткәннәр.

Баланың буе 175 см, чандыр гәүдәле, кара чәчле, коңгырт күзле.

Кызыл-зәңгәр төсле капюшонлы спорт костюмы, кара-яшел төсле кофта, кара спорт чалбары, көрән ботинка, кара шарф һәм башлык кигән.

Искәндәр турында белешмәсе булган кешеләргә шалтырату өчен номерлар: 8-937-3-1-2-112 яки 102.

Чыганак: Интертат